Efika kaj multloka instruado de nia lingvo esencas por la kreo de novaj generacioj de nia komunumo. Necesa bazo por tio estas la realtempa registado de ĉiaj, ĉiunivelaj kursoj en aŭ pri la lingvo, kiu samtempe permesas interagon de lernantoj kaj kursgvidantoj trans naciaj limoj por atingi verajn interkulturajn kontaktojn.

La oficiala registrejo de kursoj por UEA (Universala Esperanto-Asocio) kaj ILEI (Internacia Ligo de Esperantistaj Instruistoj) estas ĉe nia partnero

Ni ne povas troigi la gravecon, ke ni registru kursojn de Esperanto. En multaj landoj komenciĝis la nova lerneja jaro septembre, sekve devas ekzisti nova aro da kursoj. Ĝuste nun estas la momento anonci ilin. La listigo estas teknologie moderna, sed devas ekzisti pli ol la 166 momente registritaj kursoj ( ĉ. 60 movadaj, 30 lernejaj) kaj kursgvidantoj (70). Zorgu, ke ankaŭ via mondparto aperu sur la mapo. Zorgu, ke viaj lernantoj kaj instruistoj havu fenestron al la mondo!

Por vidi la liston kaj mapon kaj starigi interklasajn kontaktojn, iru al: http://www.edukado.net/kursejo

Tuj ĉe la eniro vi trovos facilan manieron anonci novan kurson, pere de elektronika formularo.

Ruĝaj simboloj montras lernejajn kursojn, verdaj movadajn, grizaj kursgvidantojn. La bluaj kaj flavaj cirkloj montras sumojn por urboj – per pligrandigo vi povos vidi la unuopajn kursojn.Bluaj ciferoj montras la nombron de kursoj en difinitaj urboj, la flavaj en regionoj aŭ kontinentoj. Klakado sur elementoj portos vian al pli detalaj informoj – nomo, kvalifikoj, prelegpreteco de instruistoj, nombro da lernantoj, koresponddeziroj ks.

Vi vidos, kiom utilas ĉi tiu servo – ne nur por instruistoj kaj lernantoj, sed ankaŭ por organizantoj de kongresoj kaj agantoj en Landaj Asocioj.

Se via lando aperas kiel blanka truo sur la mapo – ekagu! Kontaktu viajn kursgvidantojn, kaj instigu ilin anonci sin!

UEA alvokas al vi, ILEI alvokas al vi … anoncu tuj viajn kursojn kaj kursgvidantojn!

Kore, Stefan MacGill

Vicprezidanto de UEA

Komisiito de ILEI pri Juna amiko kaj kurso 'Esperanto Etape'.